MERADONG, 1 Mac: Projek Bumai Padi Hibrid ba tanah pemesai urung tiga ikar ba Sungai Padi ditu udah berengkah diketau.
Chairman Eksekutif Onemas Agriculture Sdn Bhd Stephen Sia madahka, pengawa nguji keterubah projek nya udah mujur ngasilka beras ti bekualiti tinggi.
“Kompeni kami diatu benung deka ngerembaika agi projek pemungkal nya ba sekeda endur di Sungai Padi,” terang iya.
Nampung penerang ari Opis Betanam Betupi Pelilih Meradong madahka, empai lama tu tadi Sekretari Tetap Opis Menteri Industri Pemakai, Komoditi enggau Pemansang Wilayah Sarawak (M-DICORD) Sirai Daha bisi nemuai seraya gawa ke projek padi hibrid ti dikemansangka Onemas Agriculture Sdn Bhd di Meradong.
Sida bukai ke bisi nyereta program nya Pegawai Betanam Betupi (Pemansang) Bagi Menua Sarikei, Siti Khadijah enggau sekeda Penulung Pegawai Betanam Betupi Pelilih Meradong.
Sebedau tu, Kaban Kunsil Nengeri (ADUN) Meradong, Datuk Ding Kuong Hiing madahka, sitak menua Sungai Padi diatu deka nyadi umai besai padi hibrid ti keterubah di pelilih nya.
Ku iya madah, pengawa nanam padi nya chukup mujur di menua China lebuh raban orang bumai di menua nya bepenau bumai sereta ambis nadai tiga kali ngetau setaun.
Berebak enggau nya, iya ngasaika pemujur projek nya beguna bendar ngambika taba baru ulih ditumbuhka ungkup pengawa bumai padi nya.
“Projek nya deka meri peluang ekonomi ngagai peranak lokal.
“Pelilih Bintangor ngembuan tanah ti manah ungkup pengawa nanam padi,” ku Kuong Hiing.
Tandu iya, enti sema padi ditanam enggau chara ke betul nya deka nangkup guna peminta berau lokal di menua tu jemah. – TVS
