Search
Close this search box.
Dua iku agi lenyau pengudah perau ke ngundan lima penumpang karam di Rumah Panjai Apan Long Menjawah, Belaga, lemai kemari. Foto JBPM

Dua penumpang perau karam di Belaga ke agi lenyau bela asal ari Kedah

BELAGA, 17 June: Dua agi lenyau lalu tiga agi ke bukai selamat pengudah perau ke ditepan lima penumpang karam di Rumah Panjai Apan Long Menjawah ditu lemai kemari.

Ba penusah nya identiti dua iku tudah lelaki ke lenyau iya nya Balavishnu Permaloo,36, enggau Rhuban Apparoo,30, gawa ba Kompeni Clinroom Indusrti Sdn Bhd, seduai iya bela asal ari Kedah.

Pengari ari Palan Pengatur Operasyen (PGO) Opis Bomba enggau Penyah Penusah Malaysia (JBPM) Sarawak madah, raban sida nerima kangau bekaul enggau kes nya pukul 4.33 lemai lalu terus nganjung raban Balai Bomba enggau Penyah Penusah (BBP) Belaga ngagai palan penusah nyadi.

“Penusah nya ngaul sebuah perau ke ngundan lima iku nyengkaum deriba perau karam urung pukul 4 lemai.

“Tiga iku tudah sida selamat lalu dua iku agi penumpang perau nya lenyau bekau ari penusah nya,” ku iya nengah sebengkah penerang malam tadi.

Ku iya, raban bomba bejalaika pengawa ngambi penerang tumu iya nya lima staf Kompeni Clinroom Indusrti Sdn Bhd udah nyuwa perau ari orang rumah panjai dikena raun ngagai Wong Menjawah.

“Maya penusah nyadi, perau ke ditepan sida karam ketegal arus deras ba Wong Menjawah. Deriba perau nguji nulung semua sida ke numpang tang dua iku anyut ditabanka arus deras,” ku iya.

Ku iya, operasyen nyidi enggau mantu (SAR) ditanguh pukul 6.30 lemai kemari lalu ditampung baru sehari tu begulai enggau ejensi bukai.-TVS

TVS provides up-to-date news, captivating dramas, and diverse program which are disseminated via channel 122 MYTV, UnifiTV and ASTRO. Stream live via MYTV Mana-Mana, UnifiTV and ASTRO GO apps now.

Follow us on social media:
Facebook: @tvsarawak , @tvs122

Instagram: @tvsarawak, @TVS_Entertainment

Telegram: @tvsarawak

TikTok: @tvsarawak, @tvs_entertainment

X: @tvsarawak

YouTube: @tvsarawak, @TVSEntertainment

WhatsApp: TVS

 

Berita Berkaitan