SARATOK, 13 Julai: Rayat ba sitak Kunsil Nengeri (DUN) Krian udah ngaga pemutus ke nemban milih pengari rayat ari Gabungan Parti Sarawak (GPS) ngarika sitak nya ba Pengawa Bepilih Besai Nengeri (PRN) ke udah, ku Friday Belik.
Kaban Kunsil Nengeri (ADUN) Krian nya madah pemutus nya ngujungka rayat Krian diatu ngasaika bemacham projek pemansang dibaruh Ejensi Pemansang Bagi Menua Betong (BDDA).
“Bisi 17 iti projek lebih agi projek infrastruktur ngemanah lalu ngaga jalai ke apin bisi ba kitai di menua Krian ditu nyengkaum Jalai Babang.
“Kemari aku udah madah kitai deka ngemanahka agi Jalai Babang ngena ungkus belanja RM10 juta udah dikemendar.
“Udah nya, kitai deka ngemanahka agi jalai Nanga Grenjang-Nanga Batang ngagai Ulu Grenjang kin ngena agih belanja RM20 juta,” ku iya.
Tandu iya, rayat Krian patut terus nyukung perintah GPS dikena nentuka mayuh agi pemansang ba DUN Krian ulih dikemujur.
“Enti kitai salah pilih maya PRN suba, utai nya (pemansang) enda datai ba kitai laban ungkup belanja tu tadi semina diberi ngagai pengari rayat GPS.
“Nya alai meri besai terima kasih ngagai kitai di Krian ditu laban kita udah panjai runding meri aku awak nyadi pengari rayat ungkup Krian ditu,” ku iya.
Iya madah munyi nya maya bejaku ba Program Datai Nemuai Ngabas Rayat ba Rumah Mathis Unyau di Ensawa Krian, pagi tadi.
Nya alai, laban ke nyadi pengari rayat Krian Friday madah diri deka bebendar ngemansangka sitak nya ngambika sebaka enggau sitak DUN bukai ba Sarawak.
Ba program nya, Friday ngemendarka agih belanja sepenyampau RM100, 000 ngagai Rumah Mathis Unyau dikena ngemanah perengkaguna ba rumah panjai nya.-TVS
