BINTULU, 22 Julai: Pengawa nyiri Datuk Awang Bemee Awang Ali Basah nyadi Yang Dipertua Dewan Negara ke-21 siti bukti nyata pengandal ngagai pengari Gabungan Parti Sarawak (GPS) ngiring kaunsil nya, ku Premier Sarawak Datuk Patinggi Tan Sri Abang Johari Tun Openg.
Iya ke mega Chairman GPS meri terima kasih ngagai Menteri Besai Datuk Seri Anwar laban udah nganjung nama Awang Bemee nyadi chalun tunggal ungkup pangku pengawa nya.
“Kitai meri pengaga ati ngagai Awang Bemee laban udah diberi pengandal ari Yang di-Pertuan Agong enggau mega Menteri Besai nyadi Yang Dipertua Dewan Negara,” ku iya madah ngagai pemberita pengudah bejadika Kompleks Methanol Sarawak Petchem ditu sehari tu tadi.
Pengawa nyiri Awang Bemee dilanggur Anwar maya Aum Kedua Penggal Ketiga Parlimen ke-15 sehari tu nganti penuduk ditinggalka niang Datuk Mutang Tagal kena 10 Mei tu tadi..
Mutang sebedau tu dipadu mangku pengawa nya nukar Tun Dr Wan Junaidi Tuanku Jaafar ke ngemaduka diri megai pangku pengawa nya ketegal dipadu nyadi Tuai Pemegai Menua Nengeri Sarawak kelapan kena 26 Januari tu tadi.
Awang Bemee ke mega ex-Kaban Kunsil Nengeri (ADUN) Nangka, Sarawak angkat sumpah nyadi Senator kena 15 Julai tu tadi pengudah disetuju Yang di-Pertuan Agong ungkup timpuh nyentuk 14 Julai 2027.-TVS
