KUCHING, 29 Julai: Pakej bekal ai 3D ari Kota Samarahan ke Sebuyau enggau Simunjan diatu udah nyapai kira-kira 94 peratus ari tikas pemansang bejalaika projek.
Menteri Ultiliti enggau Telekomunikasyen, Dato Sri Julaihi Narawi madahka projek ke beungkus RM54.9 juta nya ngaul pengawa ngaga enggau nembuka transmisyen besai meraka Jematan Batang Sadong ngagai Simunjan/Sebuyau.
Projek nya mega nyengkaum pengawa nganti paip, ngengkah baru enggau nyambung paip di Sebangan enggau Sebuyau sereta bejalaika pengawa ke bekaul di sitak Samarahan.
“Sepengudah tembu penuh dalam bulan September 2024, projek tu deka meri pengelantang ari segi meri bekal ai beresi ngagai Simunjan sereta nambahka agi tikas peneras ai ba kandang menua Simunjan.
“Ngangkatmanah sistem ngagihka paip ba kandang menua Sebangan enggau Sebuyau,” ku iya madah lebuh Hari Minggu tu tadi.
Ku Julaihi madah siti agi pakej kereja bekal ai ti udah tembu penuh di Bagi Menua Samarahan iya nya pengawa ngaga Stesyen Pam Penyungkak di Kampung Baru sereta mega Tangki Tikas Tinggi/ Pam Penyungkak di Tambirat/Tangki Tikas Tinggi di Moyan Laut/Semera/Tangki Ai enggau Pam Penyungkak di Asajaya/Tangki Tikas Tinggi di Sadong Jaya.
Kelimpah ari nya, projek ke udah tembu di sitak nya mega nyengkaum paip enggau tangki tikas tinggi di Sg Ladong, paip di Sebangan enggau tangki tikas tinggi, pam penyungkak enggau tangki tikas tinggi di Tebelu enggau tangki tikas tinggi di Sebuyau.
Nangkan ke nya pengawa negapka struktur jematan Batang Sadong nentuka tusun kereja Pakej 3D, lebih agi pengawa masang paip 600 milimeter ke diatu sereta pengawa nganti batang paip di Sg Ladong/ Sebangan/ Tebelu / Sebuyau.
Projek ai di bagi menua Samarahan tu iya nya sebagi ari pelin besai bekal ai di Sarawak ke benung dipejalaika nguna belanja ari perintah Sarawak empu.
“Projek tu deka negapka sistem grid ai Sarawak di zon selatan lalu udah nya negapka ngagai selampur Sarawak pengudah semua projek ai udah tembu,” ku iya madah. -TVS
