KAPIT, 4 Ogos: Penumbuh Makmal Digital Sekula Sekondari (SMK) Kapit ti disikap enggau teknologi pemadu baru deka ngangkatka nilai tambah nembiak, seraya nerenak bakat digital ba raban nembiak.
Ku Sapit Menteri Digital, Datuk Wilson Ugak Kumbong madahka, pengawa tu seriris enggau juluk opis menteri iya deka ngangkatka pemereti sentang guna penemu ICT, latih digital enggau mega teknologi pemadu baru.
“Terima kasih ngagai Alibaba Cloud ari Kuala Lumpur laban udah datai ngagai SMK Kapit sereta nyikap 10 buah komputer ngena teknologi pemadu baru.
“Ketegal nya, aku mai (Alibaba Cloud) ngagai SMK Kapit ke nyadi sebengkah ari sekula menua pesisir di Malaysia ngambika nembiak enda tinggal ari pemansang teknologi ti dipejalaika perintah diatu,” ku iya.
Iya mansutka jaku nya pengudah bejadika Program Jelajah Komuniti Digital ba Sekula Sekondari (SMK) Kapit ditu, kemari.
Ku iya, perintah mega mekuhka ngagai penyedia perengkaguna infrastruktur IT ke lebih manah, negapka pengelandik komputer enggau latih digital dikena ngemansangka bakat pengidup jemah dalam ekonomi digital.
Nangkan ke nya, Prinsipal SMK Kapit, Jerry Lias madahka, SMK Kapit ti dipilih nyadi palan ngatur program tu deka meri pengelebih ti ulih ngerapatka seraka digital.
“Program tu dipejalaika beguna amat dikena nentuka nembiak enda tinggal dalam transformasyen digital senutuk enggau polisi deka nyadika malaysia sebuah menua beteknologi tinggi nengah pengaku infrasruktur teknologi nyengkaum teknologi digital enggau pemansang bakat bekualiti nyadi modal mensia lebih agi dalam bidang Sains, Teknologi , Injiniering enggau Matematik (STEM),” ku iya.-TVS
