MIRI, 4 Ogos: Penyampau pengajar ti ngajar subjek Jaku Iban ba mengeri tauka menua pesisir patut diserariska ngambika senutuk enggau gaya pemansang kemaya hari.
Menteri ba Opis Premier Sarawak, Dato Sri John Sikie Tayai madahka, naka ke diatu penyampau pengajar ke ngajar Jaku Iban ba renggat sekula agi enda chukup.
“Endang amat kitai deka jaku Iban tu meruan. Laban ba maktab, institutsyen ngajar enggau universiti bisi pengajar ti deka ngajar jaku Iban.
“Naka ke diatu, semina bisi 305 iku pengajar ti bekualiti sereta bisi pengelandik ngajar Jaku Iban di Sarawak lalu nya mega enda chukup.
“Nyadi kitai ngarapka mayuh agi peturun Iban ngambi subjek elektif Jaku Iban ti diajar di sekula,” ku iya.
Iya betemu enggau media rambau ngarika Sapit Premier Sarawak, Datuk Amar Douglas Uggah Embas maya Pengerami Nutup Simposium Jaku Iban enggau Pengelandik Jari Tikas Sarawak 2024 di sebuah hotel tebilang ditu kemari.
Ku iya, taka pukul rata ungkup penama siku pengajar ti ngambi subjek Jaku Iban ba Palan Penarak Pengajar (IPG) iya nya urung 15 ngagai 20 iku lalu nya agi bedau chukup.
John Sikie mega meransang Gerempung Apai Indai enggau Pengajar (PIBG) minta ari Opis Pelajar Pelilih tauka Nengeri ngambika subjek Jaku Iban diajar di sekula enti bisi abis nadai 15 iku nembiak Iban dalam kelas nya.
Berebak enggau nya, Resolusyen Jaku Iban enggau Resolusyen Pengelandik Jari mega dianjung ngagai perintah ngambika ulih dikemendarka jemah ila.
Entara pekara dalam resolusyen nya nyengkaum nambahka pengambi program Ijazah Sarjana Muda Jaku Iban di IPGMK ngagai 100 iku nembiak enggau numbuhka Unit Ungkup Jaku Bukai (UNIFOL) di Sarawak.
Kelimpah ari nya, meri gelar Datuk ngagai sida ti diaku ba renggat antarabansa tauka UNESCO sereta numbuhka palan krafjari ba semua pelilih menua di Sarawak dikena ngumpul sereta nyual produk krafjari. -TVS
