BETONG, 4 Ogos: Genap pemenggi entukar dilalau ngibun perengka pengerara api abis nadai siti unit dalam entukar diri empu.
Tuai Balai Bomba enggau Penyah Penusah Betong PPgB Vincent Baling Yabi madah, atur nya patut dikemerat dikena nentuka sida ulih jampat mutarka penusah sebedau raban bomba datai ngesah sereta nyeliahka entukar sida angus lengis ba jalai raya.
“Kitai ngelalau semua deriba sekalika nya deriba lori ngambi nyendiaka abis nadai siti unit perengka pengerara api dalam entukar diri empu laban tu siti kereban ke pemadu diguna diatu nyema bisi penyadi angus ba jalai raya.
“Abis nadai iya ulih mantu nguna perengka pengerara api nya dikena nyeliahka penusah angus nyadi balat nyentuk entukar angus lengis bekau ari penusah nya,” ku iya.
Iya mansutka jaku nya maya dirandau TVS pengudah operasyen ngerara penusah angus ke nuntung sebuah treler ke ngundan panel solar maya ba rantau jalai ari Kuching ke Lubok Antu di Jalai Jelukong, Engkilili sehari tu tadi.
Ku iya, ari Januari nyentuk Ogos 2024 raban Bomba enggau Penyah Penusah Betong ngerikodka lima kangau tasah bekaul penusah angus ke nuntung entukar.
Tandu iya, semua kangau tasah nya ngaul kes angus kerita, motosikal enggau kerita mayuh guna (MPV) sereta entukar berat mungkur lori enggau treler.
Dulu ari nya, bisi enam iku kaban ari Balai Bomba enggau Penyah Penusah Betong diuluka Pegawai Bomba Kanan (PBK) 1 Abang Muhd Fahzil berumban ngesah palan penusah angus ke ngaul sebuah treler ba Jalai Jelukong, Engkilili.
Asil pansik tumu ba palan penusah nyadi, kebuah penusah nyadi bepun ari tayar belakang treler nya.
Nadai penusah bebadi nyawa diripotka lalu ripot penuh pasal penyadi kes agi dipansik.
Ungkup rikod, naka tu bisi 14 kes angus entukar dirikodka nyadi ba zon 3 Opis Bomba enggau Penuah Penusah Sri Aman iya nya enam kes nyadi ba Betong, tujuh kes di Sri Aman enggau siti kes ba Saratok.-TVS
