LAWAS, 25 Ogos: Opis Menteri enggau ejensi bekaul enggau pengerai sereta pengelikun patut lebih nemu pasal pengerekai penyakit monkeypox TAUKA TAMPUK BUAH (MPox) ngambika enda ngerekai ke Sarawak.
Sapit Premier Sarawak, Datuk Amar Awang Tengah Ali Hasan madah, pengerekai penyakit nya pedis diijaga enti sema iya udah ngerekai di nengeri tu.
Beduduk ari nya, atur bejejaga tumu mesti digaga dikena nyekat pengerekai penyakit nya.
“Opis Pengerai patut ngambi perati pekara tu lalu enti ulih kitai mesti ngelala penatai iya ngambika kitai utai nyekat iya.
“Pengerekai penyakit tu chukup nganu lalu enti iya bepun ari garis antara menua ambika banding nyadi kitai mesti natak pejalai kitai nengah garis antara menua nya.
“Nya mih antara atur ke patut digaga nyema iya ngerekai…nangi tusah deka dijaga,” ku iya.
Iya ke mega Kaban Kunsil Nengeri (ADUN) Bukit Sari mansutka penemu nya pengudah ngulu Pengawa Nyuaka Permit Diau Sementara (TOL) enggau Pampas Tanah Ungkup Projek di Pelilih Lawas, kemari
Bisi 145 penerima udah nerima Permit Diau Sementara ungkup Skim Pengentap Baru (SPS) Fasa 4, Skim Nangkir Genturung Pendiau (SPK) Kuala Lawas Fasa 1, SPK Kampung Sundar Fasa 1, SPK Air Terjun Lawas enggau SPK Lukutan/Karangan/ Loagan.
Udah nya 22 penerima, diberi chek pampas tanah ungkup projek Sarawak/Sabah Border 276 KV ‘Transmission Line Project’.
Awang Tengah mega bisi ngelalau raban penerima TOLpatut nguna manah bantu perintah lalu anang beambi ulih ngaga pemutus muntang baka nyual tanah TOL nya.-TVS
