SARATOK, 29 Ogos: Mayuh raban penyereta Kus Agropreneur Ngasilka Produk Mata ke diatur ditu madah diri betuah sereta beterima kasih laban udah diberi peluang nambahka penemu ba bidang ngasilka produk mata nenga kus ke diatur Opis Betanam Betupi Saratok.
Siku ari penyereta kus tu Davina Justine, 34 madah penemu ke diulih ari kus nya deka dikena enggau manah dikena mantu nambahka penatai pemisi ruang bilik.
“Kus tu ulih mantu aku ngerembaika agi produk ari Terung Dayak baka ngaga jem dikena ngulihka penatai pemisi tambah kelimpah ari ngaga krafjari,” ku iya.
Iya mansutka jaku timbal nya pengudah tembu Kus Agropreneur Ngasilka Produk Mata diatur ba ditu, kemari.
Udah nya, siku agi penyereta Dijah Dugat 36 taun ari Rumah Entinggie Krangan Saratok madah, pengawa ngatur kus nya meri penemu ke chukup besai reti ngagai komuniti lebih agi sida ke datai ari menua pesisir dikena nyungkak sosioekonomi.
“Kus baka tu enti diatur ba menua pesisir tau bendar meri pemaik ngagai komuniti lebih agi raban ke semina gawa ba rumah.
“Ari penemu ke diulih ari kus tu sida ulih ngiga penatai pemisi kediri tauka baka sida ke empai bulih pengawa ke meruan,” ku iya.
Nangkan ke nya, ba penemu Angela Tok Chong ari Rumah Umbol Semurin ngarapka kus bekaul enggau chara ngaga produk mata nya ulih dikerembai ngagai menua bukai.
“Aku ngarapka kus baka tu ulih diatur ba selampur Sarawak laban chukup manah, ukai semina ulih mantu nambahka penatai pemisi tang mega ulih meransang minat bala anak,” ku iya.-TVS
