BETONG, 30 Ogos: Betong tetap sedia nyema bagi menua nya dipilih nyadi siti ari palan endur ngatur achara lumba ti deka dipekitka ba Lumba Asia Tenggara (SEA Games) 2027 ila.
Taja pia, Sapit Menteri Nembiak, Lumba enggau Pemansang Pedagang Sarawak Dato Gerald Rentap Jabu madah pemutus nya bepanggai ngagai Opis Menteri Nembiak enggau Lumba sereta Komiti Pengatur Lumba SEA 2027.
“Endang bisi, kitai tetap bisi ati (nyadi pengatur) aku ngasai kitai nerima timbal YB Richard pan bisi ninga sampai Menteri Besai Perlis madah tu lebih besai ari Olimpik.
“Kitai ngatur di Betong ungkup Angkat Berat aja nya siti main.
“Nyadi enti ke bukai pan kitai ulih laban kitai bisi perengkaguna tambah mega stadiaum kitai Spaoh bisi, Debak bisi, Betong bisi nyadi diatu kitai bisi perengkaguna lumba.
“Nya alai, kitai ngarapka tu begunaka pemendar ari Opis Menteri Nembiak enggau Lumba sereta mega komiti ke nyadi pengatur nya,” ku iya.
Iya mansutka timbal nya pengudah Pengawa Nasih Projek Ngaga Baru Sekula Repuk ba Sekula Primari (SK) Saka Layar Betong, kemari.
Ku iya, perambu silik mega patut digaga nyema bagi menua Betong dipilih nyadi siti ari palan endur ngatur Lumba SEA ila.
Tandu iya, pengawa ngatur achara main nya di Betong deka meri pemaik ari sukut sosio ekonomi komuniti baka ke udah nyadi maya Lumba Malaysia (SUKMA)2024 ditu empai lama.
Kepenudi Malaysia nyadi tuai rumah pekit dua taun sekali tu iya nya ba taun 2017.
Naka tu, Sarawak, Sabah enggau Pulau Pinang aja udah nyemetak madah diri sedia kunsi ngatur Lumba SEA 2027 begulai enggau Kuala Lumpur.-TVS
