DEBAK, 30 Ogos: Sepenyampau RM190, 000 agih belanja ari Unit Pekara Pengarap Bukai (UNIFOR) 2024 ungkup sitak Kunsil Nengeri (DUN) Saribas udah disuaka ngagai dua sekula mission ditu.
Kaban Kunsil Nengeri (ADUN) Saribas Datuk Mohd Razi Sitam madah, pemeri agih belanja nya endang dikena mantu ngemanah perengkaguna ba sekula nya.
“Ungkup taun 2024 sitak aku di DUN Saribas udah nerima sepenyampau RM190,000 ungkup dua buah sekula iya nya SK St Christoper enggau penyampau RM120,000 lalu SK St Barnabas Blassau Debak RM70, 000 dikena ngadu tauka ngemanah agi (perengkaguna) ba dua sekula nya.
“Sebedau tu kitai (mantu) dua gerija enggau siti chappel ke mega nerima bantu ari UNIFOR,” kui iya.
Iya madahka pekara nya pengudah bejadika Pengerami Graduasi Literasi Fungsian Versi Dua (2.0) enggau Hakiki Zon Debak diatur Opis Pengintu Pengelantang Raban Bansa (JKM) Bagi Menua Betong ungkup taun 2024 ba Dewan Mellenia Debak, pagi tadi.
Beduduk ari nya, Razi meri terima kasih ngagai Perintah Sarawak dibaruh iring Premier Datauk Patinggi Tan Sri Abang Johari Tun Openg laban udah numbuhka UNIFOR.
Ku iya, penumbuh UNIFOR chukup manah dikena mantu rumah-rumah sembiang ke ukai Islam ngambika sida ulih ngatur sebarang aktiviti ke udah dilanggur.-TVS
