BETONG, 31 Ogos: Timbal ari raban nembiak chukup manah ba achara E-Lumba, Tenis, Pickle bol enggau lumba rayat ke diatur nyerumba Karnival Ensikal Layar (LCC) 2024.
Sapit Menteri Nembiak, Lumba enggau Pemansang Pedagang Sarawak Dato Gerald Rentap Jabu madah, pemanah timbal nya kelai lumba nya majak dikerindu mensia mayuh di Sarawak lebih agi di Betong.
“Achara nyambil kitai mega ngaul lebih ari 1000 iku (penyereta) iya nya e-Lumba, tenis, pickle bol, lumba rayat, ensikal nyadi semua nya dipeda kitai mayuh pemain biak ke datai lebih agi Fun Ride tadi ari sekula-sekula primari enggau ke bukai.
“Tu nyungkak agi pengawa ngena ensikal di Betong lalu kitai endang bisi palan enggau mayuh jalai ke ulih ditengah nyadi terima kasih ngagai semua,” ku iya.
Iya mansutka jaku nya pengudah bejadika Pekit Lumba Ensikal ba Kategori A enggau Kategori B ba ada pekit LCC di Betong, sehari tu tadi.
Ku iya, pekara nya mega mandangka majoriti raban nembiak ba Sarawak nyengkaum ba Betong udah majak ngelala aktiviti lumba enggau main.
Pia mega ku iya penatai temuai ke chukup mayuh ngelawa taba pengerami nya mega mandangka pengawa ngatur LCC ulih nyadi pematak besai temuai ngagai Betong.-TVS
