DEBAK, 31 Ogos: Bala orang tuai enggau sida ke nyereta Program Literasi Fungsian Versi 2.0 enggau Kelas Pugu berasai temegah laban udah nembuka kelas diri sereta nguasa 3M.
Ba penemu Miss Obeng, 62 taun ari Kampung Hilir Spaoh, ngasaika pemujur nembuka kelas ari program diatur KEMAS Betong nya endang pekara besai reti ba iya.
“Enti aku endang meransang orang tuai ke ngelama tu enda nemu macha diatu udah nemu mimit-mimit. Rundi ga asai ati diajar Pengajar Juana dalam timpuh empat bulan.
“Ngelama tu sigi enda nemu nyepil, diatu udah nemu mimit mih. Berasai gaga amat ulih masuk program tu,” ku iya maya dirandau TVS sepengudah tembu Pengerami Graduasi Graduet Pelajar Literasi Fungsian Versi Dua (2.0) enggau Kelas Pugu Zon Debak diatur ba Dewan Millenia Debak, kemari.
Nangkan ke nya, ba penemu Linda Jali 44 taun ari Rumah Panjai Suri Lalang madah diri chukup temegah laban diatu iya udah landik 3M.
“Aku berasai temega laban udah nyereta program tu, udah nemu macha, nulis, ngira lalu kami ngarapka penemu ke diajar pengajar kami ulih dikena berandau enggau diri sebilik nengah telefon sereta mantu kami ari segi (ngelala) teknologi IT jeman diatu,” ku iya.
Udah nya, ku penemu Ijok Tindin, 56 taun meri terima kasih ngagai Perintah Sarawak laban udah ngatur program baka nya ke udah meri empas positif ngagai komuniti menua pesisir ari sukut pelajar.
“Terima kasih ngagai perintah enggau semua Menteri mih laban mantu meri kami penemu ngemansangka kami dalam pelajar sekula diatu nyau udah nemu macha enggau nulis,” ku iya.
Pengerami nya dikemujurka Sapit Menteri Pemansang Indu, Anak Mit enggau Pemansang Komuniti Sarawak ke mega ADUN Saribas Datuk Mohd Razi Sitam.-TVS
