BETONG, 2 Sept: Gerempung Ensikal Sarawak (SCA) sedia betunggang sukung ngagai perambu deka ngangkatka pelilih Betong nyadi palan pemansang lumba ensikal di Sarawak.
Presiden iya, Datuk Benjamin Hasbie madah, perambu dibantaika Sapit Menteri Nembiak, Lumba enggau Pemansang Pedagang Sarawak Dato Gerald Rentap Jabu nya chukup nemban enti beratika pemisi ke dikembuan Betong ungkup pemansang lumba nya.
“Kitai meda iya nya Betong endang siti zon pemadu nemban endur ngatur siti palan ensikal laban perengkaguna iya enti diperati perambu deka ngatur BMX Trek, peramu deka muka velodrom tebuka enggau mega ari sukut MTB (palan) tu endang nemban.
“Ungkup raban gerempung kitai deka bekerejasama enggau raban YB Gerald ungkup ngatur penerang sereta numbuhka palan pemansang lumba ensikal ditu,” ku iya.
Iya madah munyi lebuh dipinta meri timbal bekaul enggau penerang dipansutka Dato Gerald Rentap Jabu pasal perambu ngaga velodrom tebuka enggau Trek BMX di Betong pengudah nanggulka Karnival Ensikal Layar (LCC) 2024 ditu, kemari.
Ku iya, raban SCA mega nyukung pengawa opis menteri deka numbuhka siti program dikumbai pemansang timpuh panjai ungkup lumba ensikal diri Betong.
Tandu iya, pekara nya endang patut beduduk ari pelilih Betong diatu majak dikelala bala penyerata enggau tim ensikal ari dalam enggau luar nyadi pengatur lumba ensikal di Sarawak.-TVS
