SEBUYAU: Ai pasang besai tauka bah ngenyit ti nyadi di Sebuyau maya hari minggu udah ngujungka sekeda kandang endur balat kena empas ti ngerikodka bacha tikas ai peninggi 6.5 meter naka ke jam 5.30 lemai hari minggu.
Gaya angin ke balat bepuput ngujungka peniki ai enggau jampat enggau penusah nya makin balat lebuh dinding pengenan di tisi sepemanjai sungai Sebuyau pechah ketegal kena pangka gelumbang ti ngujungka sekeda rumah ke bedampih rusak ketegal arus sungai ti deras enggau ngujungka penusah bah nyadi.
Antara kandang endur ti balat kena empas iya nya Giat Mara Batang Lupar, Kampung Hilir Sebuyau, Pasar Sebuyau, Kampung Hulu, Kampung Seberang, Kampung Bajong, Kampung Tungkah enggau kandang endur ti baruh.
Naka ke diatu, situasyen penusah nya ba tikas ke enda nganu nyawa mensia, ke alai Komiti Penusah Ngenyit Bah udah ngambi sekeda atur bejejaga dikena nerima ripot enda ngira maya.
Peranak dilalau seruran bejejaga enggau nyikap diri tumu enti nyema bisi pemindah deka digaga.
