KUCHING: Perintah Sarawak chakah mutarka penanggul penyekut jalai di pelilih Kuching.
Berindik ari nya, lebih 75 peratus lampu trafik deka ditukar ngena lampu trafik pintar di Kuching ti ulih ngurangka penyekut jalai alun.
Menteri Kaunsil Kandang Menua enggau Pengawa Berumah, Dato’ Seri Dr Sim Kui Hian madah, projek lampu trafik pintar tu udah dipejalaika kenyau taun 2017 ba sepuluh palan nyengkaum Jalai Batu Kawa dikena ngurangka penyekut jalai alun ti suah nyadi di sekeda kandang endur di Mengeri Kuching.
“Ketegal meri empas ke manah, Kepala Menteri Datuk Patinggi Abang Johari Tun Openg udah ngemasukka lampu trafik sebagi ari projek Mengeri Pintar.”
Ngambi ripot ari UKAS nengah penerang ti dibantai dalam Facebook kena Hari Minggu kemari, lebih 75 peratus lampu trafik di Kuching deka ditukar ngena lampu trafik pintar manggai ba taun 2021.
Kelimpah ari nya, ku Dato’ Sri Dr Sim, data pejalai lampu trafik pintar ukai semina deka disedia ungkup Opis Kaunsil Kandang Menua, tang mega ngagai mensia mayuh kena ngemuntangka penanggul penyekut jalai alun.
Sebedau tu, Sapit Kepala Menteri Tan Sri Dr James Jemut Masing maya ba Aum Kunsil Negeri (DUN) maya Hari Lima ti udah madahka Sydney Coordinated Adaptive Traffic System (Scats) diatu dipejalaika ba baruh Inisiatif Mobiliti Pintar enggau nirika 72 lampu trafik jalai alun dikena ngemudahka pejalai mensia mayuh ti nengah nya.
