SERIAN: Projek ngaga jalai baru ba kandang endur kampung, ngelandai enggau nembuka endur main takraw sereta ngaga tekad ai baa Kampung Koran Barie deka dipejalaika enda lama agi.
Ngambi penerang ari UKAS, Kaban Kunsil Negeri (ADUN) Bukit Semuja, John Ilus madah, Perintah Nengeri udah nyendiaka ungkup penyampau RM200,000 dikena bejalaika projek nya.
Iya mansutka jaku nya ngatur penemuai kereja ba Dewan Kampung Koran Barie maya hari tiga.
Kelimpah ari nya, iya madah, Perintah Nengeri udah ngungkupka RM50 juta ba taun tu dikena ngemanahka tikas sereta ngaga baru rumah endur sembiang bagi pengarap ukai Islam ba selampur Sarawak enggau RM70 juta dikena ngaga Kompleks UNIFOR ba Kuching.
Terang iya, mayuh projek udah dipejalaika ba taun 2019 baka projek jalai kebun ba Kampung Koran ti diteruska nitihka guna genturung pendiau kampung .
Beduduk enggau nya, iya ngaraka peranak ba kampung semampai meri kerejasama enggau raban ejensi bejalaika pengawa sereta kunteriktor ngambika projek tu lanchar.
