SIBU: Kemari Sarawak Energy Bhd (SEB) ngeripot nengah siti surat pemadah pasal sebuah kedai aksesori kerita tiga tingkat ba Lorong Sawi ditu ti ditemu ngenchuri letrik.
Penyalah nya ditemu dalam siti operasi ti dipejalaika SEB begulai enggau Divisyen Penerit Atur enggau Undang-undang Opis Menteri Utiliti Sarawak sereta Polis Diraja Malaysia (PDRM).
Dalam operasi nya, ti dipejalai pengudah ripot diterima ari mensia mayuh, tim teknikal tetemuka kuasa letrik ti dichuri nengah kabel ti dipasang lalu dilalai dalam tanah. Â
Kabel nya disambung terus ari tali letrik atas, ti ngelaungka meter letrik, lalu mansutka bil letrik ti baruh.
Bacha letrik ti diambi ba kedai nya nunjukka pengempu kedai nya ke bendar patut mayar RM16,000 sebulan, ukai semina RM900 aja, baka ti direkodka dalam bil ninting bulan.
Semua meter enggau tali letrik ti diubah udah dichabut lalu dirampas ngambika nyadi bukti penasat.
Ripot polis udah digaga, lalu pengempu kedai sereta pengempu begunan deka dikangau polis ngambika mantu penasat nundaka Seksyen 33(5) Ordinan Letrik.
Ngenchuri letrik endang siti penyalah jenayah ti ulih diukum mata duit RM100,000 tauka jel ngelama lima taun, tauka kedua-dua iya, enti ditemu amat salah.
Tu kes ngenchuri letrik kedua dalam kandang bulan tu ti bisi kaul enggau kabel ti dipasang terus nengah baruh tanah.
Kes terubah nyadi di Kuching alai pengempu siti rumah dua tingkat ba Tiya Vista, Kota Samarahan, ditemu ngenchuri letrik ngena chara ti sebaka.
Mensia mayuh dilalau enda kelalu arapka kompeni nyediaka servis ti madah diri ulih ngurangka letrik ti diguna tauka ulih nulung pengempu endur dagang nguna letrik enggau nadai sekat nengah pengawa ngubah meter.
SEB deka semampai bejalaika aktiviti meresa meter enggau aktif di serata Sarawak, begulai enggau Opis Menteri Utiliti Sarawak, Polis sereta opis bekuasa bukai ti bisi kaul.
