KUCHING: Bank mindah kin kitu ti disediaka perintah menua Sarawak dikearapka uluh meri servis ti ngemudahka peranak menua pesisir.
Kepala Menteri Sarawak Datuk Patinggi Abang Johari Tun Openg madah, bisi empat buah bank deka nyendiaka servis nya ba sekeda kandang endur di menua pesisir.
“Ba penemu aku, nyendiaka servis bank tu endang siti chara ti tau dikena kitai mutarka penanggul ti ditapi rayat di menua pesisir. Aku arap semua bank ti bisi nyendiaka servis tu udah netapka jam operasi sida, lalu deka madah ngagai rayat kitai pasal servis tu,” ku iya.
Abang Johari mega madah, servis ti baka nya chukup manah laban mayuh kandang menua pesisir nadai bisi servis bank.
Bank Simpanan Nasional (BSN) deka nyendiaka servis kin kitu di Sebauh enggau Sungai Asap, lalu Bank Rakyat bejalaika servis nya di Sebauh, Tatau, Sungai Asap enggau Belaga.
RHB Bank mega bisi nyendiaka servis bank kin kitu di Asajaya, Sadong Jaya, Balingian, Oya enggau Igan.
“Agrobank deka nyendiaka servis di Padawan, Bau, Lundu, Sematan, Lingga, Pantu, Tebedu, Asajaya enggau Sebuyau. Semua pelilih tu endang kandang endur ti mayuh mekuh ba pengawa betanam betupi sereta dagang temuai lalu diatu benung chakah ngaga jalai besai tebing tasik,” ku Abang Johari.
Iya mega meransang bank bukai ti bisi pengingin deka nyendiaka servis baka nya, lalu ngarapka servis nya ulih dikerembaika ngagai endur bukai dudi hari.
Kena 8 Mei 2020, perintah menua Sarawak ngemendarka inisiatif servis bank mindah kin kitu ba menua pesisir Sarawak baruh Pakej Bantu Khas Sarawakku Sayang enggau ungkup RM1.6 juta.
Ba baruh pakej nya, perintah nengeri ngungkupka RM200,000 ngagai bank ti bisi kaul dikena meli pengangkut baka van ti tau nyadi bank mindah kin kitu.
