Kuching , 11 Jun – Selampai sulam motif bungai kechala mujur narit ati mensia mayuh lebih agi raban penguna media rama.
Berindik ari Atur Tagang Pemindah (PKP) ti diteritka lebuh musin Gawai tu tadi, mensia mayuh dipeda chukup kreatif. Mayuh macham pekit bisi diatur nengah chara dalam tali arus ngambika pengerami Gawai Dayak taun tu enda bangat ngasuh ati seilu-ilu.
Cecelia Lagak enggau Sangin Juat, bekerejasama dalam ngatur Pekit Selampai Sulam Online 2021 tu.
“Buah penemu tu datai lebuh aku beratika mayuh macham pekit baka pekit Kumang online. Udah nya aku berunding, nama kebuah aku enda ulih ngatur pekit selampai sulam? Sepengudah nya aku lalu mai Sangin Juat ngatur pekit tu,” ku iya lebuh dirandau pemberita TVS.
Priscilla Nyambong, 31 taun asal ari Kapit dipadu ngempu gelar champion pekit tu lalu nerima perais RM400, produk ari CC Beauty, selapuk enggau tiket wayang Filem Belaban Hidup, bag rutan ari algasana butik enggau baju ari Anita Nyuta.
Udah nya, penuduk lumur dua, Lydia Bajok, 35 taun mega ari Kapit nerima perais RM300, lalu ditangkan ke enggau lumur tiga, Stephanie Ho nerima perais RM200.
Kelimpah ari nya, 10 iku pemenang nerima perais pengaga ati, iya nya nerima produk enggau baju pandak dipelanja CC Beauty.
Cecelia Lagak, 33 taun asal ari Kapit siku ari pengatur pekit tu madahka diri bulih penemu ngatur pengawa tu laban ke udah meda mayuh pekit ngepan diatur.
Pemenggi CC Beauty udah ngemunka bisnes tu kenyau ari taun 2015 lalu ngarapka asil pengelandik jari bansa Dayak terus pegari dikelala ba serata dunya.
