KUCHING, 25 Feb: Bajet 2023 ti dibantaika Menteri Besai, Datuk Seri Anwar Ibrahim diasaika siti bajet ke manah sereta mungkur semua sukut pemansang menua.
Menteri Dagang Temuai, Industri Kreatif Enggau Seni Pemerindang, Dato Sri Abdul Karim Rahman Hamzah madah selampur menua deka ngasaika empas ari pekara ke dibantai nya.
“Ungkup Sarawak kitai endang nadai mantah, laban enti kitai meda penyampau ke diberi bisi nambah, keterubah bekaul enggau penyampau ke diberi perintah besai madahka 112, 300 juta, sebedau tu semina 16 juta.
“Kelimpah ari nya 5.6 bilion ungkup Sarawak enggau 6.5 ungkup Sabah.
“Aku meda bajet tu endang bajet ke chukup manah laban mungkur semua sukut industri enggau mega ekonomi, nadai ngenusah. Enti mayuh chukai baru nyangka deka ngenusah,” ku iya.
Karim madah munyi nya ba aum pemberita pengudah bejadika Program Sape Junior enggau Malam Apresiasi RTM Sarawakku Sayang lebuh Hari Lima.
Taja pia ba penemu karim, agih belanja dikena ngemanah palan pesaka dunya ke udah diaku Gempung Pelajar, Saintifik Enggau Main Asal Serakup Besai Bansa (UNESCO) patut diperunding.
“Iya ke diberi nya semina ungkup Pulau Pinang enggau Melaka aja.
Kitai ba Sarawak bisi Pesaka Dunya Mulu lalu aku nemu ungkus dikena ngintu palan tu chukup besai lalu palan nya ulih meri untung ke manah ari sukut dagang temuai.
Nya entara utai ke nadai kena rintai dia. Enti ulih perundingka mih palan nya laban iya mega udah diaku sebagi ari palan pesaka UNESCO. Nyadi nya patut diperunding diberi agih belanja,” ku iya.
Dulu ari nya, Karim bisi madah diri deka ngagihka belanja sepenyampau RM50,000 ngagai Kelab Rekreasi RTM dikena sida ngatur sebarang aktiviti ke bekaul.
Sama bisi datai Direktor Broadcasting RTM Sarawak, Nasrul Hakim Mohd Noh.-TVS
