KUCHING, 18 Mei: Proses netapka baru adan ungkup sitak pengawa bepilih besai di Sarawak dipelaba deka dipejalaika ba taun tu.
Sapit Menteri Ba Opis Premier Sarawak (Undang-Undang, Sempekat Malaysia 1963 (MA63) enggau Kaul Sarawak-Perintah Besai) Datuk Sharifah Hasidah Sayeed Aman Ghazali madah pekara nya beduduk ari pengawa pansik senentang nya deka tembu taun tu iya nya sepengudah abis timpuh lapan tahun.
“Dibaruh Pekara 113 ba Kunstitusyen Perintah Besai, Komiti Pengawa Bepilih Besai (SPR) patut sepanjai maya meresa baru adan sitak pengawa bepilih besai perintah besai (Parlimen) enggau nengeri (DUN).
“Pengawa ngatur adan baru semina ulih dipejalaika sepengudah abis timpuh lapan taun,” ku iya.
Iya mansutka penerang maya nyaut tanya ari Kaban Kunsil Nengeri (ADUN) Batu Kitang, Lo Khere Chiang pasal peminta nambahka penyampau penuduk Sarawak ba parlimen nyerumba Aum Kunsil Nengeri (DUN) Sarawak, sehari tu tadi.
Tandu iya, pengawa netapka baru adan ungkup Sarawak berengkah dipejalaika taun 2015.
Ku iya, pengawa nambahka penuduk Sarawak di Parlimen ulih dipejalaika nengah dua chara, kelimpah ari ubah ngagai Pekara 46 dalam Kunstitusyen Perintah Besai.
“Pekara tu udah dibantaika ngagai Kaunsil Khas Sempekat Malaysia 1963 (MKMA63) ba aum nya kena 8 September 2022, lalu Menteri ba Opis Menteri Besai (Parlimen enggau Undang-undang) maya nya udah setuju deka mantaika peminta tu ngagai Aum Kabinet Perintah Besai,” ku iya.
Sebedau nya, Sharifah Hasidah madah penumbuh МТРМА63 deka ngemuntang agi pengawa randau senetang peminta hak Sarawak baka ke udah dipekat dalam MA63.-TVS
