SARATOK, 18 Mei: Penusah karam ba Wong Bakun maya agi gawa ba Sekula Primari (SK) Batu Keling di Belaga taun 1986 kelia entara pengingat pemadu pait lalu meruan dikeingat Sengli Baba, 62 taun nyentuk sehari tu.
Maya dirandau TVS nyerumba Hari Pengajar ke diintu kemari, Sengli madah penusah nya nyadi maya iya enggau raban bukai mulaika diri ke sekula ari Pasar Belaga.
“Nyadi siti pengingat pait lebuh aku keterubah ngajar ba menua Belaga iya nya SK Batu Keling. Sebuah sekula nya ke chukup jauh maya nya ukai ba endur SK Batu Keling ke diatu.
“Sekula nya siti ari sekula lumur tiga pemadu jauh dilawa ba menua Belaga. Enti mudik ngena perau sehari bedau temu datai laban nya bepanggai ba gaya hari.
“Nya entara pekara ke chukup dikenangi, aku irau ke diri dituntung penusah maya ba rantau ai.
“Nyadi bisi sekali maya taun 1986 maya pulai ari Pasar Belaga, enda memukai lebuh kami nengah Wong Bakun (bedau bisi tekat Bakun baka diatu).
“Siti wong ke pemadu besai ba Belaga sereta dipelaba aku pemadu besai ba Sarawak. Maya nya kami ngena perau, baru deka ngelajak dia perau kami karam…Puji Tuhan amat laban agi dikasih Petara, kami selamat. Nyadi nya siti utai ke pemadu pait pengingat enda ulih buai aku nyentuk ke sehari tu,” ku iya nusui sebagi ari kisah diri dalam pengelama udah ngajar dalam 36 taun ke udah.
Berekat ari pengeransing gawa Sengli kala nerima Anugerah Perkhidmatan Cemerlang (APC) ba taun 2004, 2011 enggau taun 2022 tu madah ke penusah ke kala nuntung nya enda sesekali ngelemi ke semangat iya neruska pengawa ngajar anak bansa.
Lebuh ngelansa pengingat bukai, Sengli madah chukup mayuh pengerindang ke enda alah rintai maya ngajar ba menua ulu.
“Nyadi ba aku rindu mih aku rindu bisi ‘cabaran’ munyi ku Melayu laban enti enda pia nadai ga utai ditusui kitai.
“Idup ba menua ulu din enti kitai ngira iya lauk iya sigi chukup mayuh nadai tusah enda baka diatu dunya nyau majak mansang utai nya tadi makin mimit-semimit makin nadai senadai.
“Nyadi mata duit kitai diatu pan nadai rega agi nyadi kelia nyau pulai kia baru nya tadi pasal lauk senang amat meli baka reti ikan empurau maya nya baru taun 1986, 1987, 1988 nadai kitai pechaya enti kitai meli maya nya suba sekilo semina RM5 aja rega ikan empurau, “ ku iya.
Nangkan ke nya, ku tandu apai ngagai tiga iku anak tu madah, kenang pait manis ba sepemanjai timpuh ke gawa nya endang meruan dikeingat.
“Nyadi ba aku sekumbang sepemanjai aku ke udah ngajar nyentuk ke diatu utai ke manah, iya ke enda manah nya tadi sigi nyadi ke cherita pengingat kitai ke nyadi pengajar.
“Pekara ke pedis endang sigi bisi semua nya ulih ditapi, pekara ke senang nya enda ibuh dikira agi nya ambi ke pengelantang kitai,” ku iya.
Ba ujung randau enggau TVS, pengajar Sengli Baba mesan bala ke agi bejalaika pangku pengawa nyadi pengajar anang mudah mantul lebuh ngereja pengawa ke berat.
“Kereja semua pengawa enggau penuh pengeransing laban ba pengujung iya nyema udah teleba dia pengawa nya deka nyadi lempung,” ku iya meransang bala pengajar bukai lebuh dirandau ba rumah iya empu di Saratok.
Ungkup penemu, Sengli Baba asal ari Simunjan, kala ngajar ba SK Batu Keling (tiga taun) ari taun 1986 nyentuk 1988 sebedau pindah ke SK Kalok di Pusa ba taun 1997 lalu ngajar dia nyentuk 2007.
Udah nya, iya pindah ke SK Saint Peter di Saratok ba taun 2008 nyentuk ke iya pinchin taun 2022.-TVS
