SARATOK, 25 Ogos: Ulah angkun enggau taluk ke menua patut diterenak tumu ngagai raban nembiak kenyau ari sida masuk pra sekula.
Kepala Pengajar Sekula Primari (SK) Kalaka Central Maurice Diong Achang madah, tu beguna bendar ngambika bala nembiak sekula ulih meretika pemesai guna semangat angkun ke menua.
“Tuju kitai ngatur program baka tu iya nya dikena nerenak semangat taluk sereta angkunka menua kelimpah nanam semangat patriotik ba bala nembiak.
“Kelimpah ari nya, nengah program baka tu mega ulih nyadi pelasar dikena ngedut kaul entara pengajar enggau apai indai nembiak,” ku iya.
Maurice madah munyi nya ngagai TVS pengudah tembu pengawa ngemataka Program Nembiak Pra Sekula SK Kalaka Central Ngaga Replika Menira Malaysia ba pintu penama sekula nya, ditu kemari.
Nangkan ke nya, ku Maurice arapka program ke baka nya ulih diatur baru ba taun dudi.
“Tu mih program keterubah baka tu diatur kami ba renggat Pra Sekula kami ditu.
“Nyadi aku ngarapka enggau sukung tegut bala apai indai enggau pengajar pengawa baka tu ulih diatur taun baru.
“Pengawa baka tu endang meri empas ke besai ngagai nembiak laban bala nembiak endang patut diajar angkun ke menua kenyau ari sekula renggat tumu,” ku iya.
Ungkup penerang, aktiviti begagaka replika menira Malaysia nya keterubah diatur ba pra sekula SK Kalaka Central Saratok.
Nembiak, apai indai sereta pengajar bela begulai ngaga menira Malaysia ari butul ai mineral dikena nerenak semangat angkunka menua beserimbai enggau Hari Kebangsaan 2023.
Program nya dipasuk 11 iku nembiak ngambi bagi ba program nya seraya disempulang pengajar enggau apai indai sida.-TVS
