BETONG, 3 Mac: Urung 57 iku pesakit selaput mata udah mujur bebuntas muai selaput mata ba Sepital Betong.
Kaban Parlimen Betong, Dr Richard Rapu madah, program kerejasama Opis Pengerai Malaysia (KKM) enggau raban Kelab Lion Metro Kuching (LION) nya diatur pengelama dua hari kena Hari Lima enggau Hari Enam tu tadi.
“Sehari tu (Hari Enam) kitai bisi ngatur Program Kem Selaput Mata dibaruh Kelab Lion Kuching Metro begulai enggau KKM iya nya Panel Klinik Mindah Kin Kitu.
“Serak tu bisi 57 iku pesakit, kemari (Hari Lima) sida udah bejalaika pengawa bebuntas ungkup 36 pesakit enti enda ilap aku lalu laluh iya deka tembu sehari tu.
“Tebal agi pesakit tu datai ari menua Spaoh, Debak di Betong enggau bisi mega pesakit datai ari sitak Skrang, Sri Aman enggau mega Pusa, Beladin sereta mega Maludam,” ku iya.
Iya mansutka pekara nya maya dirandau pengudah penemuai enda lama ngabas sida ke benung bebuntas selaput mata ba Sepital Betong, kemari.
Program KKM enggau Kelab Lion Kuching Metro nya endang diatur ninting taun kena bulan March enggau bulan Ogos.
Pemujur program nya mega asil sukung belanja sereta penyiru Sapit Premier Sarawak ke mega Kaban Kunsil Nengeri Bukit Saban, Datuk Amar Douglas Uggah Embas.
Serak tu masuk ke-18 kali program nya udah diatur kenyau ari taun 2013 lalu udah mujur ngeraika mata urung 900 iku pesakit selaput mata di Betong enggau menua ke besemak.-TVS
