SPAOH: 3 April: Bisi 73 iti Projek Ngemanah Jalai Kebun nengah agih belanja dibaruh Ejensi Pemansang Bagi Menua Betong (BDDA) deka dipejalaika ba sitak Kunsil Nengeri Bukit Saban.
Sapit Premier Sarawak Datuk Amar Douglas Uggah Embas madah, semua projek ke beungkus RM30 juta nya dikena mantu raban orang bumai enggau ngemuntangka pengawa raban pekebun mit ba sitak nya.
“Kitai (perintah) udah ngagihka belanja RM30 juta lalu udah diperati enggau dipansik.
“Ari nya kami beratika belanja nya ulih dikena ngemujurka 73 projek ngemanah jalai kebun ba sitak tu.
“Aku ngarapka (projek jalai kebun) nya ulih mantu bala pekebun sekalika nya dikena sida nanam sawit, lada tauka getah,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya pengudah ngabas siti ari Projek Ngemanah Jalai Kebun ditu, kemari.
Sama bisi nyempulang pejalai Uggah iya nya Kaban Parlimen Betong Dr Richard Rapu, Sekretari Politik Kepada Premier Sarawak, Roselind Mapong Sabai, Residen Bagi Betong, Richard Michael Abunawas enggau ke bukai.-TVS
