DEBAK, 5 April: Sekeda raban ke ekstrem ba pengarap endang suah ngaga achu’ tauka provokasyen senentang sesebengkah isu.
Taja pia, ku Sapit Menteri Pemansang Orang Indu, Nembiak Mit enggau Pengelantang Komuniti Sarawak Datuk Mohd Razi Sitam, raban ke baka nya mesti berunding panjai sebedau ngaga pemutus ke enda manah sereta ulih ngeruga pengelantang enggau pengelikun menua.
“Ari penemu kediri, aku madahka dalam semua pengarap endang bisi aktivis sereta sekeda orang ke ekstrem ba pengarap lalu rindu ngapi.
“Nya kebuah gaya enda manah ungkup pengelantang rayat kitai ti tau ngujungka enda lantang dalam komuniti.
“Beduduk ari nya, aku madahka ditu tetiap pekara mesti bisi chara dikena mutar,” ku iya.
Iya ke mega Kaban Kunsil Nengeri (ADUN) Saribas madah munyi nya lebuh dipinta bejuraika senentang insiden sebuah kedai KK Mart di Jalai Satok, Kuching ke ditikau enggau bom petrol sebedau tu.
Ku terang iya madah, raban iya sedia bekerejasama enggau ejensi perintah ke bukai ke bekaul baka Opis Penyerakaup Menua enggau Integrasyen Nasional Sarawak (JPNINS) sama besaup ngiga chara mutarka penanggul nya.
“Pekara tu deka dikeaum ba baruh Kaunsil Pemansang Rama, kitai bisi mayuh bengkah program ba baruh kaunsil ke diberi perati ti mai tuju nyaga penyerakup rayat.
“Kitai nguji nambahka program ke baka tu lalu seraya nya kitai ngembuan perambu bekerejasama lebih manah agi enggau opis menteri ke bekaul baka Opis Menteri Penyerakup Intergrasyen Nasional enggau mega ejensi-ejensi perintah ke bekaul.
“Kitai deka naka ulih mutarka penanggul ke betingkah enggau adat sereta budaya kitai,” ku iya.
Apin lama, Pengempu enggau Chairman Eksekutif Gerup KK Supermarket enggau Superstore Sendirian Berhad Datuk Seri Dr Chai Kee Kan udah betemu enggau Yang di-Pertuan Agong Sultan Ibrahim betuju minta ampun bekaul enggau isu nya.
Pengawa betemu ke dipejalaika pengelama 15 minit nya dibantai tiki Seri Paduka Baginda Sultan Ibrahim ba lama Facebook iya.-TVS
