KOTA SAMARAHAN, 16 April: Serakup Dayak Bukit Kelingkang (DBK) Pampang Melikin begulai enggau Kebudayaan Dayak Bumi Kenyalang (KDBK) deka ngatur Kelas Ngajat Renggat Ke-14 ba ungkup pengani menua Samarahan enggau Serian.
Pengajar Korea Anak Musit ke mega Pengatur Program Kelas Ngajat Renggat Ke-14 madah, pengawa nya diatur berindik ari pengeran iya ti deka meda main asal terus ditegika, tebilang dikelala nyadi ke identiti bansa.
Kelimpah ari nya, kelas tu dipejalaika ketegal udah nerima sukung enggau timbal ti manah ari mensia mayuh ti masuk kelas ngajat ba renggat Ke-7 nyentuk ngagai Ke-13 apin lama ke udah, ku iya.
Ba renggat Ke-14 tu bisi Kelas Ngajat Indu, Kelas Ngajat Pua Kumbu, enggau Kelas Ngajat Orang Ulu ti deka dipejalaika.
“Kelimpah ari nya Kelas Ajat Lelaki, enggau Terabai pan sama deka dibuka ba Balai Ringin,” ku iya nengah sebengkah penerang sehari tu tadi.
Peranak menua tu ti besemak ba kandang nya diperansang enggau masuk kelas belajar ngajat ba renggat Ke-14 sereta tau ngerejista nama berengkah ari diatu, lalu dipelaba deka diatur sepengudah diputuska raban pengatur kelas ila.
Korea Musit madahka, kelas tu tebuka ngagai semua renggat umur, enda ngira lelaki tauka indu, mit tauka besai sereta diatur ba Samarahan enggau Balai Ringin.
“Barang sapa ti deka ngerejister, masuk kelas belajar ngajat tu tau betanya ngagai aku empu ba lumur 017-855 2885 (Korea Anak Musit)” ku iya.
Penerang ke silik kita tau betanya ngagai Korea sereta pengajar ngajat lelaki ba lumur 0128729355 (Reagen) enggau 0128099349 (Brain).
“Berindik ari nya aku ngarapka kitai anang muai peluang ti disediaka serakup tu, serayaka ngerembai sereta ngetankan main asal bansa kitai.
“Angkun sereta kemeranka mih adat enggau budaya bansa ngambika terus tebilang ke serata dunya,” ku tandu Korea. – TVS
