KUCHING, 16 April: Op Selamat nyerumba Hari Raya Aidilfitri taun tu ngerikodka tujuh kes bebadi nyawa ba Sarawak.
Kepala Polis Sarawak Dato Mancha Ata madah, penyampau nya mandangka penurunan siti kes dibanding lapan kes ba taun 2023.
“Penguna kerita iya nya raban ke pemadu mayuh bebadi nyawa enggau penyampau empat iku. Tu ditangkan penguna motosikal bisi tiga iku,” ku iya madah nengah sebengkah penerang, sehari tu tadi.
Op Selamat berengkah 8 April lalu tembu kena 13 April.
Mancha madah, sepanjai Op Selamat tu, Sarawak ngerikodka 354 kes bebadi ba jalai raya.
Penyampau tu mandangka penambah iya nya ari 325 kes ba Op Selamat 2023 ngagai 354 kes bebadi ba jalai raya nyerumba Op Selamat 2024 iya nya niki 29 kes.
Entara kebuah penambah penyampau kes bebadi tu sepanjai timpuh Op Selamat 2024 tu iya nya pengilap enggau pengelali deriba nya empu laban puntar nagang entukar maya ngelui ari tatak pengelaju ngujungka ensayar, belantak enggau kerita bukai, ilap maya pansut simpang sereta ngelantak ari belakang.
“Kebuah bukai iya nya gaya jalai ke enda manah baka belubang, tiku tajam sereta penanggul kerita enda diadu enggau manah,” ku iya. – TVS
