SPAOH, 4 Mei: Raban Tuai Rumah enggau Tuai Raban Bansa (KMKK) di wilayah tu lebih agi di sitak Parlimen Betong patut meretika polisi enggau kuing tuju perintah.
Kaban Parlimen Betong Dr Richard Rapu madah, sida mega patut bejalaika tanggungpengawa berat enggau nyadi mata sereta pending dalam mantu pengari rayat matau pemansang projek ke dipejalaika perintah ba menua sida.
“Mayuh projek infrastruktur enggau projek rama ke bukai bisi dipejalaika perintah.
“Nya alai, kita ke nyadi Tuai Rumah, Tuai Genturung Pendiau, Tuai Komuniti patut bejalaika tanggungpengawa mantu kami ke nyadi pengari rayat matau projek ke benung dipejalaika ba menua diri.
“Peratika bala Kunteriktor bejalaika pengawa. Enti sema bisi enda betul enda nithka standard kita enda tau ngeripot pekara nya ngagai agensi perintah,” ku iya.
Iya madah munyi nya maya ngarika Sapit Premier Sarawak Datuk Amar Douglas Uggah Embas maya Pengerami Merarau Mantar Gawai 2024 diatur Gerempung Tuai Rumah Rimbas Ulu, Debak di Diwan Komuniti Spaoh, sehari tu tadi.
KMKK mega ku iya ulih ngaga ripot ngagai Pegawai Pelilih ba sitak diri empu nyema bisi penanggul bekaul enggau projek ngambika ulih diputar enggau jampat.-TVS
