DEBAK, 4 Mei: Palan Aktiviti Orang Tuai (PAWE) bejalaika fungsyen nyadi siti pelantar pemadu badas dikena nerenak semangat penyerakup ke ngaul pupu bansa ba wilayah tu.
Menteri Pemansang Indu, Ruang Bilik Enggau Komuniti (KPWKM) Dato Sri Nancy Shukri madahka, PAWE mega ulih nyadi endur betemu ke beguna dalam neruska pengidup ninting hari.
”Aku bisi meda dalam komiti ti ngatur program tu semua bansa bisi magang.
“Nya alai, kitai meri pengaga ati ngagai semua sida laban mujur ngempung rayat pupu bansa.
“Nengah program baka tu kitai ulih meda. Aku bisi bejaku enggau YB Dr Richard pasal kitai ba Sarawak mesti beratika pekara ke bisi sensitiviti ngaul siti-siti bansa enggau pengarap laban nya ti ngidupka kitai di Sarawak.
“Sarawak tu sigi nyadi chunto penyerakup dalam menua Malaysia,” ku iya.
Nancy mansutka jaku nya rambau bejadika Palan Aktiviti Orang Tuai (PAWE) ditu, kemari.
Nancy nerangka, PAWE mesti nyadi kelai penyerakup enggau pemaik rayat di Sarawak.
Penumbuh PAWE diatu dikemendarka lebih ari sebuah ba sesebengkah parlimen, tang mesti nentuka takah entara PAWE nya tadi enda kelalu semak ari pangan diri.
Nitihka rikod, PAWE komuniti debak ti ditumbuhka kenyau ari 18 Mei 2022 nyadi palan ti ke-13 di selampur Sarawak sereta penyampau semua kaban PAWE nya diatu, bisi 137 iku.-TVS