KUCHING, 6 Mei: Sarawak nyemetak madahka pengeransing dalam nyukung juluk menua ngurangka pemansut karbon sepenyampau 45 peratus maya taun 2030.
Tuai Pemegai Menua (TYT) Sarawak, Tun Pehin Sri Dr Wan Junaidi Tuanku Jaafar madah, antara inisiatif pemansang kuasa gadung ke dipejalaika Perintah Sarawak endang mungkur bemacham pengawa.
“Aku temegah laban Perintah Sarawak udah nyadi pemungkal ngagai inisiatif ngalih ngagai Kuasa Ulih Dikemaru (TBB), dikena ngurangka pemansut karbon.
“Tu terang nengah inisiatif pemansang kuasa gadung baka kuasa gadung, solar, biojisim, biofuel, hidrogen, kereban injin bilun ke meruan sereta pejalai inisiatif mekul, nguna enggau nyimpan karbon (CCUS),” ku iya.
Iya madah munyi nya maya bejaku bejadika Pengawa Beradat Muka Penggal Ketiga Aum Kunsil Nengeri (DUN) Sarawak Ke-19 ditu pagi tadi.
Wan Junaidi madah, pengawa Perintah Sarawak dalam ngalih kuasa enggau dagang karbon bela nerima timbal ke manah ari pengemeran industri antarabansa.
Ku iya, pengawa tu deka muka mayuh agi peluang beranakka puku, dagang enggau nyendiaka batang pengawa baru ungkup anak Sarawak.
Aum DUN Serak tu chukup bereti laban keterubah iya TYT Sarawak Ke-8 Tun Pehin Sri Dr Wan Junaidi Tuanku Jaafar bejadika Aum DUN Sarawak kenyau iya dipadu mangku pengawa nya bulan Februari tu tadi. -TVS
