KUCHING, 10 Mei: Yang di-Pertua Dewan Negara Datuk Mutang Tagal udah midang urung pukul 11.46 pagi Hari Lima ba Institut Jantung Negara (IJN), Kuala Lumpur.
Berita sinu nya disahka Opis Yang di-Pertua Negara nengah siti penerang.
“Pengerembai silik pasal pengawa ngubur enggau meri basa niang deka dipadahka udah tu,” ku penerang nya.
Mutang, 70, sebedau tu diperubat ba Insitut Jantung Negara sepengudah dibai pulai ari Azerbaijan kena 6 Mei tu tadi ketegal ti enda bepengerai, dulu ari nya iya enggau delegit ari Malaysia bejalaika pengawa nemuai seraya gawa iya berengkah 29 April tang iya pulai lebih tumu ari timpuh ke ditetapka.
Yang di-Pertua Dewan Negara nya nguluka raban deligit Malaysia ngulu Forum Dunia senentang Dialog Antara Budaya, ti diatur kena 1 nyentuk ke 3 Mei tu tadi di Baku, Azerbaijan.
Sebedau ngulu forum nya, iya sempat nemuai meri basa ngagai Presiden Azerbaijan Ilham Aliyev, Menteri Besai Ali Asadov enggau Speaker Milli Majlis Azerbaijan Sahiba Gafarova, sereta ngulu aum sereta licha ari pemekuh industri ba menua nya.
“Niang sida Mutang sebilik meri terima kasih ngagai bala mayuh ke meri penyinu ati enggau sampi sereta sukung ke diberi ngagai sida lebuh napi penguji jam ke diatu,” tandu penerang nya.
Mutang dipilih nyadi Yang di-Pertua Dewan Negara ke-20 enggau angkat sumpah ba Dewan Negara kena 19 Februari 2024.
Iya Orang Ulu keterubah dichiri Yang di-Pertua Dewan Negara sereta kala gawa nyadi Kaban Parlimen Bukit Mas, Sarawak, dalam taun 1982 nyentuk ke 1990.
Niang ngembuan pengelandik pelajar enggau praktis ba dalam bidang undang-undang.
Niang mega ninggalka siku balu enggau tiga iku anak.-TVS
