SRI AMAN, 10 Mei: Siku lelaki beumur 37 taun nyau deka bebadi nyawa pengudah kerita ke ditepan iya ngelanggar belakang sebuah lori ke paking ba tisi jalai malam tadi.
Tuai Balai Bomba enggau Penyah Penusah (JBPM) Sri Aman PPgB Andrew Vengitasamy madah bekau ari penusah nya tudah lelaki nya tekepit ba penuduk deriba lalu udah dipansutka raban bomba ngena kereban khas.
“Bilik operasyen JBPM Sri Aman nerima kangau bekaul enggau sebengkah penusah aksiden ba jalai raya ba Bukit Begunan iya nya Jalai Serian- Sri Aman urung pukul 10.58 malam.
“Operasyen nya betuaika PBK II Mohamad Fadhli Bin Buyong sereta disaup enam iku staf ke bukai.
“Seninjik datai ba palan ba penusah nyadi dia sida meda amat bisi penusah aksiden ngaul sebuah kerita perodua Kancil enggau sebuah lori taja pia lori nya nadai agi ba palan penusah nyadi.
“Tudah ke tekepit mujur dipansut ngena kereban khas sereta diserah ngagai raban Opis Pengerai Malaysia (KKM) sereta terus dibai sepital ungkup perubat,” ku iya nengah sebengkah penerang sehari tu tadi.
Pengudah nentuka palan nya likun raban bomba terus mulaika diri baru ngagai balai urung pukul 1.47 pagi.
Sama bisi ngesah penusah nya raban Polis Diraja Malaysia (PDRM). -TVS