DEBAK, 21 Mei: Perintah Gabungan Parti Sarawak (GPS) endang nyadi tulang belakang dalam ngatur pemansang ungkup rayat di wilayah tu, ku Datuk Amar Douglas Uggah Embas.
Sapit Premier Sarawak nya madah, mayuh bantu udah diberi nengah Opis Pengintu Pengelantang Pendiau Raban Bansa Sarawak.
“Kitai nemu gaya Perintah GPS tu chukup tulung (ambika banding) ari pengawa betanam betupi, ari pengawa ngidupka diri, pengawa sekula sekalika suntuk maya sakit bisi opis pengintu pengelantang nulung.
“Kelimpah ari nya sida ke bisi pengelandik ba pengawa pengelandik jari mega bisi disediaka bantu.
“Tuju perintah GPS endang deka meda rayat ngasaika pengelantang, terus maju.
“Sapa aja tusah deka dibantu, sida enda diteju pia aja,” ku iya.
Iya madah munyi nya maya bejadika Program Sejambak Kasih Gawai Dayak Renggat Betong 2024 diatur ba Rumah Panjai Basil Teraie, ditu ensana.
Uggah mega nesau semua Tuai Raban Bansa enggau Tuai Rumah (KMKK) lebih agi di Betong anang takut datai ngelawa opis servis ADUN diri empu enti bisi napi sebarang penanggul ke nekul.
Nya alai, ku iya rayat ba wilayah Sarawak patut terus seruran segulai sejalai enggau pangan diri ke pemaik semua.
Sama bisi ngulu pengawa nya Sapit Menteri Pemansang Indu, Anak Mit enggau Pengelantang Komuniti Datuk Mohd Razi Sitam, Direktir Opis Pengintu Pengelantang Pendiau Raban Bansa Adana Jed, Residen Betong Richard Micheal Abu Nawas enggau ke bukai.-TVS