SARATOK, 22 Mei: MyKiosk endang pantar pemadu manah ngagai pedagang mit ba nengeri tu lebih agi di Saratok ngerembaika dagang sida ngagai renggat ke lebih tinggi.
Kaban Kunsil Nengeri (ADUN) Krian madah, pengawa nyendiaka Mykiosk seriris enggau juluk perintah ti deka meda mayuh agi pedagang mit di pelilih nya ngambi bagi ba pengawa dagang dikena nambahka penatai pemisi diri.
“MyKiosk tu siti pantar ungkup raban pedaja kitai ngepunka diri ba pengawa dagang.
“Nyadi alai, arapka nengah pemisi MyKiosk tu dagang sida ulih dikerembai ngagai tikas ke lebih tinggi,” ku iya.
Friday mansutka jaku nya rambau Pengawa Nyerahka Kunchi MyKiosk ngagai pedagang ke udah dipilih ari sitak Kunsil Nengeri Krian enggau Kalaka di Dewan Serbaguna Opis Pelilih Sarawak, empai lama.
Beduduk ari nya, iya ngarapka perengkaguna baka nya deka ngeranchakka agi aktiviti dagang mit enggau sosio ekonomi di Saratok.
Iya mega nangkan bala pedagang ke bedagang ba kiosk nya seruran ngemeratka pemeresi.
Sama bisi bejaku ba program nya, ADUN Kalaka Mohd Duri ngarapka nengah pemisi perengkaguna Kiosk nya deka mantu ngemayuhka agi produk ke dijual bala pedagang.
Bisi 35 iku pedagang ari sitak Saratok enggau Roban udah nerima kunchi kiosk diri empu nyerumba program nya.
Sama bisi datai Senator Pele Peter Tinggom, Sekretari Opis Pelilih Saratok Mccrea Joseph Pererra enggau ke bukai.-TVS
