SARATOK, 25 Mei: Kaban Kunsil Nengeri (ADUN) Friday Belik nesau mensia mayuh lebih agi ba Saratok sampal datai ngerichahka Pengerami Ngelalu Pengabang Gawai Dayak 2024 ke deka diatur iya kena 3 June tu.
Ku iya, pengerami nya deka diatur ba Diwan Rumah Dayak Sarawak berengkah pukul 11.30 pagi sampai ke lemai.
“Ungkup Gawai Dayak 2024 raban DUN N.39 Krian deka ngatur Pengerami Ngelalu Pengabang kena 3 June 2024 di Diwan Rumah Dayak Saratok berengkah pukul 11.30 pagi nyentuk ke lemai.
“Nya alai kitai ngarapka mensia mayuh di Saratok lebih agi ari Krian sampal datai enggau ngerichah Pengerami Gawai taun tu begulai enggau ketuai sereta mega mensia mayuh di Saratok,” ku iya.
Iya madah munyi nya pengudah penemuai enda lama ngabas Rumah Panjai Selat Dunggaw ba Sungai Anak Peligong ditu, kemari.
Ku iya, temuai ke datai maya nya ila nadai ditagang beperindang baka belagu laban nadai aktiviti khas ke bukai diatur maya nya.
Pengerami Ngelalu Pengabang Gawai Dayak serak tu kedua kali udah diatur Friday Belik kenyau udah udah dipadu nyadi pengari rayat ba sitak DUN Krian.-TVS
