LUBOK ANTU, 25 Mei: Penyadi ujan bangat udah ngujungka sebuah langkau arau ba Sekula Primari (SK) Ulu Lemanak ditu kena penusah ampuh bah pagi tadi.
Tuai Rumah Juan anak Lugat ke mega gawa nyadi Jaga Pengelikun ba sekula nya madah, bekau ari penusah ampuh bah nya dia tali wayar ke dikena ngantung paip ke seberai putus lalu anyut.
“Nya alai sekula kami diatu putus bekal ai laban batang paip nuju ngagai sekula nya udah anyut.
“Arapka raban bekaul ulih mutarka penanggul tu enggau lengkas sebedau sekula dibuka baru,” ku iya madah ngagai TVS, pagi tadi.
Rumah sekula ke balat tekeruga kena ampuh bah tu iya nya sebuah langkau arau ke digaga ba sekula nya.
Langkau arau tu digaga piak sekula ungkup bala apai indai ke datai ari rumah panjai ke jauh ari sekula nya nguan anak sida besekula lebih agi bala anak ke agi Pra Sekula enggau Primari Satu.-TVS
