ENGKILILI, 25 Mei: Tiga peminta ungkup sitak Engkilili iya nya ngaga waterfront Engkelili, jematan sereta nukar status Engkilili ngagai pelilih penuh deka dibai ngagai Premier Sarawak ngambika ulih dikemendar.
Sapit Premier Sarawak Datuk Amar Douglas Uggah Embas madah, iya chukup nyukung peminta nya laban tiga peminta nya deka meri mayuh pemaik ngagai rayat di sitak Parlimen Lubok Antu lebih agi ba Pelilih Mit Engkilili.
Datuk amar douglas madah diri deka betemu enggau premier sarawak datuk patinggi tan sri abang johari tun openg ngambika ulih berundingka peminta nya.
“Berapa iti peminta tadi? Waterfront, siti jambatan enggau Pelilih Mit Engkilili aku deka mai ngagai Premier (Sarawak Datuk Patinggi Tan Sri Abang Johari Tun Openg).
“Nyadi pasal waterfront semaya aku enggau nuan (MP Lubok Antu), maya betemu enggau Premier tua ngenatai ke peminta nuan laban aku nyukung peminta nuan tu di menua (Engkilili) ditu,” ku iya.
Iya madah munyi nya maya bejaku ba Karnival Lubuk Antu 2024 di Dataran Rusa Engkilili, pagi tadi.
Nangkan ke nya, Kaban Parlimen Lubok Antu Roy Angau Gingkoi maya bejaku madahka atur ngubah status pelilih penuh ungkup Engkilili deka mai mayuh ubah positif ngatur pelilih mit nya.
Nya alai, ku iya tusun pengawa dalam opis, pemansang enggau servis dibaruh bidang kuasa perintah lokal di Engkilili deka lebih berurun sereta lanchar.
“Enggau peluang tu Datuk Amar (Douglas Uggah Embas), aku mantaika perambu minta Perintah Sarawak ngambika Pelilih Mit Engkilili tu diangkat nyadi pelilih penuh.
“Nyema ulih nyadi pelilih penuah, semua pengawa atur opis, pemansang enggau servis dibaruh bidang kuasa Perintah Lokal di Engkilili deka nyadi lebih berurun enggau lanchar.
“Arapka juluk enggau peminta kami tu ulih dikemendarka Perintah Sarawak,” ku iya. -TVS
