SARATOK, 13 Feb: Opis Bomba enggau Penyah Penusah (JBPM) Saratok ngambi awak pengelama sejam alai mansutka siku lelaki ti tekepit dalam lori bekau ari penusah aksiden ke nyadi ba Jalai Saratok tengah malam tadi.
Tuai JBPM Saratok, Penulung Penguasa Bomba Putra Ila madah raban sida nerima kangau tasah pasal penusah nya urung pukul 12.25 pagi lalu ngerah 12 iku staf ngesah palan penusah.
“Seninjik datai ba palan penusah nyadi raban Bomba tepedaka penusah aksiden kediri ngaul sebuah lori ke udah singit sepiak mua penuduk deriba lalu melintang ngempang Jalai Pan Borneo.
“Lori nya ngundan buah sawit datai ari Betong nuju ke Saratok lalu bisi siku lelaki tekepit ba penuduk deriba sereta agi idup,” ku iya madah dirandau pengari TVS Saratok lebuh Hari Dua.
Udah nya, iya madah tudah ke tekepit mujur dipansutka ari lori urung pukul 1.18 pagi ngena kereban bomba sereta terus dianjung ke Sepital Saratok ngena ambulans.
Beduduk ari nya, Putra ngelalau mensia mayuh lebih raban deriba lori besai patut seruran ngemeratka pengelikun iya nya tentuka diri empu regas sebedau deriba jauh.
Ku tandu iya, sida ke deriba patut belelak chukup sebedau neruska pejalai nuju palan ke dituju.-TVS