KUCHING, 3 April: Bala tebangkar dalam pekara pelajar patut diberi peluang ngaga mayuh agi inovasyen ngaul kereban sanding ti tau ngemuntangka nembiak nguasa pengelandik macha, nulis enggau ngira (3M).
Pengelicha ba Universiti Pendidikan Sultan Idris, Tanjong Malim Perak, Dr Patricia Ganing madahka, Perintah Sarawak nengah Opis Menteri Pelajar, Inovasyen enggau Pemansang Bakat (MEITD) ti ulih meri sukung ngagai bala tebangkar ngambika sida ulih merambu seraya nengkebang insiatif ti tau mantu sekula mutarka penanggul nembiak ti apin nguasa pengelandik 3M ba renggat sekula primari.
“Ambika chunto aku bisi siku bakih ti benama Nur Hidayah Rashidi landik ngajar nembiak jampat nemu macha udah mujur ngaga inovasyen bup ke diberi nama ‘Pantas Membaca dan Menulis Bahasa Melayu’.
“Sebedau tu iya bejalaika pansik pengudah beratika penanggul nembiak ti lubah macha nguna teknik macha sereta inovasyen iya udah mujur bulih tiga midul emas ba dalam pekit,” ku iya madah.
Dr Patricia nerangka, bala pengajar ba sekula mega patut berunding baka ni chara ngaga inovasyen ke tau mantu nembiak sida nguasa pengelandik 3M nya sereta patut dikunsi enggau dikerembai ngagai mensia mayuh.
“Kelimpah ari nya, pemujur anak nguasa pengelandik 3M mega bepanggai ba sukung enggau peransang ti diberi apai indai ngagai anak sida ba rumah,” terang iya rambau ditelefon pengarang berita TVS empai lama tu tadi.
Tandu iya, apai indai ke bisi pemandai enggau pelajar tinggi mesti nguna manah pengelebih nya ngajar sereta ngembing anak sida nengah bemacham inisiatif ke bukai.
Sebedau tu, Menteri ke nguasa MEITD Dato Sri Roland Sagah Wee Inn madahka MEITD terus komited mantu mutarka penanggul nembiak sekula ti bedau nyapai tikas ke manah dalam pengelandik 3M.-TVS
