KUCHING, 12 April: Polisi enggau inisiatif manah ti dipejalaika Perintah Sarawak mesti terus disukung ngambika mantu ngangkatka tikas pengelantang rayat di nengeri tu.
Kaban Kunsil Nengeri (ADUN) Daro, Safiee Ahmad madahka, sukung rayat endang beguna dikena nentuka semua langkar enggau perambu pemansang ti digaga perintah Gabungan Parti Sarawak (GPS) ba baruh iring Premier Sarawak Datuk Patinggi Tan Sri Abang Johari Tun Openg ulih dikemujurka.
“Kitai deka semua langgur pemansang ti dibai perintah GPS bisi daya nyapai juluk Sarawak maju manggai taun 2030 jemah,” ku iya madah rambau ditelefon pengarang berita TVS empai lama tu tadi beserimbai enggau pengerami Hari Raya Aidilfitri.
Safiee nerangka, pengawa ngabang nyerumba pengerami sekalika Hari Raya, Gawai Dayak, Krismas enggau ke bukai nyadi pelasar ke chukup manah dalam nempa seraya negutka tali penyerakup rayat pupu bansa di Sarawak.
“Ambika chunto di sitak DUN Daro ditu, komuniti Iban ari rumah panjai mayuh agi datai ngabang ngagai rumah aku.
“Sida ngabang bebala mayuh enggau ati ti gaga. Pia mega enggau bansa bukai nadai bechiping tauka nangi begulai enggau pangan diri maya bisi pengerami,” terang iya.
Tandu iya, penyerakup enggau pengawa begempung patut terus ditegap enggau ditegi laban nya siti pengelebih ti dikembuan rayat di Sarawak kenyau ari suba nyentuk jemah. – TVS
