KUCHING, 15 April: Inisiatif Opis Menteri Pelajar (KPM) ngerembaika atur ngambi chalun pengajar dipelanja opis menteri nya nyereta latih pra servis Program Bachelor Degree Pengajar (PISMP) berengkah taun tu siti atur ke nemban.
Kaban Kunsil Nengeri (ADUN) Krian Friday Belik madah nengah inisiatif nya deka muka mayuh agi peluang gawa ngaga raban ke deka masuk bidang pelajar.
“Tu endang siti inisiatif ke chukup manah nyadi kitai endang nyukung inisiatif tu laban iya meri peluang ngagai orang ke biak baka di menua pesisir ke deka masuk bidang ngajar.
“Nyadi kitai ngarapka bisi timbal ke manah ari bala nembiak sama ngerebut peluang tu nyadi siti ari chara dikena ngulihka pengawa,” ku iya.
Friday mansutka penemu nya maya dirandau pengari TVS pengudah ngulu Pengerami Ramah Tamah Aidilfitri 2024 ba Begunan Kunsil Nengeri Sarawak ditu, kemari.
Sebedau tu kena 13 April tu tadi, KPM udah mansutka penerang madahka atur ngambi chalun pengajar dipelanja KPM dibaruh PISMP deka dikerembaika ngagai raban lepas Setipikit Tinggi Sekula Malaysia (STPM), Setipikit Tinggi Agama Malaysia (STAM) enggau Program Matrikulasi.
Atur nya betuju dikena meri mayuh agi peluang ngagai chalun ke bisi ati masuk bidang ngajar enggau minta nyereta program nya dudi hari.-TVS