KUCHING, 19 April: Inisiatif pemadu baru Opis Menteri Utiliti enggau Telekomunikasyen dalam ngemanahka enggau nambahka kualiti ti ngaul empat bidang utiliti deka dibantaika dalam aum Kunsil Nengeri (DUN) Sarawak ti deka diatur kena 6 Mei tu ila.
Sapit Menteri Utiliti enggau Telekomunikasyen (Utiliti) Datuk Dr Abdul Rahman Junaidi madahka, inisiatif ti deka dibantaika nya dikena nambahka bungkur bekal ai, karan, internet enggau pengawa ngidar tong gis Petros di nengeri tu.
“Empat ejensi tu benung senaka ulih meras bejalaika pengawa ngambika kami ulih tetiap utiliti bisi daya terus meri pemaik ngagai rayat di selampur Sarawak.
“Rambau aum DUN ti deka diatur bulan Mei, pekara tu deka diberi perati Menteri Utiliti enggau Telekomunikasyen Dato Sri Julaihi Narawi lebuh nyimpul jurai opis menteri nya,” ku iya.
Iya mansutka jaku nya rambau dirandau pemberita pengudah ngatur Program Rumah Terbuka Aidilfitri ti bisi digulu Premier Sarawak Datuk Patinggi Tan Sri Abang Johari Tun Openg enggau bini iya, Puan Sri Datuk Amar Juma’ani Tun Tuanku Bujang malam kemari.
Abdul Rahman nerangka, senentang bungkur bekal karan, Sarawak Energy Berhad bisi pelin timpuh pandak, sedang enggau panjai dikena nyapai taga 100 peratus bekal karan manggai taun 2050.
Bekaul enggau deka nyapai taga 100 peratus bekal ai beresi manggai taun 2030, opis menteri nya napi pemar ketebal agi nyendiaka bekal ai ngagai menua ulu.
“Berindik enggau nya, kami bisi siti program khas ti berengkah diatur kami kenyau ari taun 2017 ke dikumbai Projek Bekal Air Alternatif Sarawak.
“Bisi sekeda kandang endur ke enda ulih nerima bekal ai beresi nengah paip ai ketegal kelalu jauh, nya alai kami deka ngaga sistem kediri empu,” tandu iya.-TVS