BETONG, 18 Mei: Opis Menteri Pengerai Malaysia (KKM) diansak lengkas mutarka isu kurang lutur enggau misi ke ditapi Sepital Betong.
Direktor iya, Dr Tan Jung Khang madah, isu nya dikearapka nerima perati ari KKM dikena nentuka servis pengerai ungkup mensia mayuh di menua nya ulih tetangkupka pemayuh pesakit.
“Enti dikira semua kitai (Sepital Betong) begunaka urung 15 iku laban diatu kitai udah bisi semilan iku.
“Aku ngarapka penyampau nya ditambah agi lima tauka tujuh iku agi ditangkan ungkup misi kitai minta ditambah urung 10 iku,” ku iya.
Iya mansutka pekara nya maya dirandau media pengudah Program Nemuai Ngagai Sepital Betong Nyerumba Pengerami Gawai Bagi Menua Betong 2024, pagi tadi.
Program nya dipenyadika bini Kaban Kunsil Nengeri (ADUN) Bukit Saban, Datin Amar Dato Doreen Mayang seraya nyuaka urung 80 iti hamper ngagai bala pesakit ke benung diperubat ba wad sepital nya.
Ku tandu Dr Tan atur nambahka penyampau lutur enggau misi nya chukup beguna awakka sida ke gawa ngembuan timpuh belelak ke chukup laban diatu sida diperatika gawa kekadang bisi manggai 36 jam.
Nangkan ke nya, iya madah Sepital Betong mega begunaka perengkaguna bukai baka mija, katil enggau kerusi pesakit ke udah luya nyengkaum kit pengerai enggau irkon.-TVS