SARATOK, 25 April: Niang Laskar Kanan, Jurulatih Jasmani (JJM) Joanna Felicia Rohna siku bakih ke mentas sereta nelap, pia ku siku ari bakih ke chukup tebela niang iya nya Melvin Bunan.
Lebuh nusui ngagai pengari TVS, Melvin ke mega siku pengajar ba sekula primari di Saratok madah, mayuh pengingat begulai enggau niang lebih agi maya sida agi ba sekula sekondari suba.
“Pengingat ke enda ulih dibuai aku maya begulai enggau niang suba iya nya maya kami dalam Kelab Drama Komsas SMK Balai Ringin iya nya Gerup Hembusan Pawana ba taun 2014.
“Maya nya, kami ngarika sekula ba Drama Komsas lalu bulih gelar champion enggau lumur dua ba renggat nengeri ke diatur ba SMK BM Saratok taun 2014.
“Nya mih pengingat manis maya aku agi begulai enggau niang kelimpah aku empu kala ngajar menyadi aku enggau iya mega bejalaika pengawa iya ngiring menyadi aku baka menyadi iya empu,” ku iya maya dirandau pengari TVS Saratok bekaul kenang begulai enggau niang maya jeman sekula.
Nya alai, ku Melvin pemidang niang chukup berasai laban niang nyau baka menyadi kandung diri empu.
“Kepenudi aku betemu enggau niang iya nya taun 2015, maya nya aku mesan iya ngasuh ngibun menyadi aku ke sama enggau iya ba kem laban menyadi aku junior iya.
“Nyadi iya pan bejalaika pengawa diasuh aku baka menyadi tuai ngiring menyadi biak.
“Maya taun 2015 maya kami ngambi pemutus peresa SPM maya nya mih kepenudi betemu enggau iya lalu udah nya semina betanya berita nengah Facebook, Mesenger enggau Whatsapp aja,” ku iya.-TVS
