SEBUYAU, 27 April: Perintah Sarawak setuju mayar dulu kos projek ngaga sekula ba pelilih tu sementara nganti agih belanja ari perintah besai.
Premier Sarawak Datuk Patinggi Tan Sri Abang Johari Tun Openg madahka, nya siti langkah rapat ti betuju dikena ngerumban pemansang projek sekula repuk nya ke ngaul kos entara RM50 nyentuk RM60 juta nyerangkung dua buah sekula di Gedong enggau Simunjan.
“Aku udah minta Sekretari Perintah Sarawak madah ngagai Direktor Pelajar ngemunka dulu pengawa ngaga sekula nya.
“Udah nya kitai minta perintah besai mayar pulai kos nya,” ku iya madah rambau Program Ramah Tamah Aidilfitri Pelilih Sebuyau, Hari Enam.
Abang Johari ke mega Kaban Kunsil Nengeri (ADUN) Gedong nerangka, mekanisme ngeluarka dulu agih belanja, udah nya dibayar baru ulih dipejalaika nguna turu Bank Pemansang Sarawak (DBOS) ti ditumbuhka perintah Sarawak dikena bejalaika projek besai baka sekula ba Sebuyau.
Sebedau tu, Menteri Utiliti enggau Telekomunikasyen Sarawak, Datuk Seri Julaihi Narawi ke mega Kaban Kunsil Nengeri (ADUN) Sebuyau minta perintah Sarawak berunding ngeluarka agih belanja dikena ngaga sekula sekondari baru di Sebuyau pengudah taba projek nya dikemendarka perintah besai.
Taja pia, Julaihi nerangka sekula ganti ti ngembuan 1,000 iku nembiak nya agi nganti timbal pemansang ari Opis Menteri Pelajar (KPM).
Tuai Pemegai Menua (TYT) Nengeri Sarawak enggai bini iya Toh Puan Fauziah Mohd Sanusi bisi datai ngulu seraya ngerichahka Program Ramah Tamah Aidilfitri Pelilih Sebuyau ke mega digulu lebih 3,000 temuai bukai.
Sama bisi ngulu pengerami nya Menteri Pemansang Indu, Nembiak Mit enggau Pengelantang Komuniti Dato Sri Fatimah Abdullah, Sapit Menteri Nembiak, Lumba enggau Main sereta Pemansang Pedagang Datuk Dr Ripin Lamat, Kaban Parlimen Batang Lupar Shafizan Kepli sereta Kaban Kunsil Nengeri (ADUN) Simunjan, Awla Dris. – TVS
