KUCHING, 28 April: Penyelai enggau pemanah budaya ke ngaul rayat pupu bansa di Sarawak ulih disema baka pemakai tradisional etnik Hakka-Hopoh ke dikumbai ‘Lei Cha’.
Premier Sarawak, Datuk Patinggi Tan Sri Abang Johari Tun Openg madahka, pemaik enggau pemayuh leman bansa ke bisi ba menua tu mih ke nyadi gulai nambahka pengaya budaya di wilayah tu.
“Enti kitai meda bansa Melayu bisi, China bisi, Iban bisi enggau ke bukai. Baka ‘Lei cha’ tu mih bisi bechampur.Tu mih ngayanka budaya kitai di Sarawak.
“Enda ngira penatai etnik, batang pengarap kitai ulih begulai sejalai enggau pangan diri.Nya mih ke nyadi identiti Sarawak,” ku iya.
Iya mansutka jaku nya rambau Program Makai Lemai Festival Hopoh Se-Malaysia ditu malam tadi.
Abang Johari nerangka, kerejasama rat semua orang enda milih renggat mega chukup beguna ngambika Sarawak terus nyingkang ke mua dalam nyapai juluk wilayah maju manggai taun 2030.
”Nya alai, dikena nentuka Sarawak ulih nyapai juluk nya, kitai minta semua komuniti pupu bansa bekerejasama enda ngira Melayu, China, Iban tauka Orang Ulu, semua kitai mesti terus beserakup enggau pangan diri,” ku tandu iya.
Udah nya, Abang Johari madah Sarawak diatu benung ngalih nuju era ekonomi baru ti ngemeranka ekonomi gadung enggau teknologi baru baka semikonduktor ti betuju dikena negapka agi penumbuh enggau pengerembai ekonomi menua tu.
Festival Hopoh Se-Malaysia 2024 tu iya nya achara ti diatur ninting taun ke diatur komuniti Hopoh di Malaysia.
Pengerami nya taun tu diatur Serakup Hopoh Sarawak ke digulu semua kaban serakup ari selampur Malaysia nyengkaum Singapore enggau Brunei. -TVS
