KUCHING, 4 Mei: Penuduk mengeri besai Kuching nyadi mengeri ke-11 pemadu beresi di dunya deka terus dijaga nyengkaum nentuka ikas pemeresi angin kelimpah ari pemansang fizikal.
Premier Sarawak Datuk Patinggi Tan Sri Abang Johari Tun Openg madah, ngerunding pasal pemeresi angin dalam nyukat pemeresi mengeri, dia Perintah Sarawak udah negemeratka senentang pemeresi pejalai trafik enggau mega perengka pengangkut ke diguna mensia mayuh.
“Nya alai kitai (Sarawak) udah berengkah enggau Hidrogen.
“Pengangkut mensia mayuh kitai deka nguna kereban injin pemadu beresi.
“Pia mega dibaruh pelin Sarawak, arapka kerita pan nguna kereban injin pemadu beresi sekalika nya elektrik tauka hidrogen.
“Sistem ART kitai mega deka siti ari atur iya nya perengka pengangkut mensia mayuh nadai ngamahka angin.
“Nyema pekara nya nyadi, ekosistem mengeri kitai nyadi siti mengeri ke nyengala beresi ari sukut langit enggau fizikal,” ku iya.
Iya mansutka pekara nya maya Pengerami Ramah Tamah Aidilfitri Dewan Bandaraya Kuching Utara (DBKU, kemari.
Abang Johari mega madahka genap mengeri mansang di wilayah tu patut ngembuan taman rampa pengeraja asal ke meruan.
Inisiatif tu dipejalaika nengah atur meri gazet sitak Bukit Siol dibaruh DBKU nyadi Taman Pengeraja Asal enggau Bukit Stutong dibaruh Kaunsil Mengeri Besai Kuching Selatan (MBKS).
Sitak bukai bela udah digazet iya nya Taman Pengeraja Asal Piasau di Miri, Taman Pengeraja Asal Bukit Lima di Sibu enggau Taman Pengeraja Asal Samalaju di Bintulu.
Nengah atur nya, ku iya deka meransang ngagai daya idup komuniti ke beresi enggau kurang penyakit, udah nya ngujungka nempa komuniti lebih gayu dudi hari.-TVS